અમેરિકામાં પોતાને ઇજા પહોંચાડીને હૉસ્પિટલ જનારા કિશોરોની સંખ્યામાં 11 વર્ષમાં 163%નો વધારો થયો
અમેરિકામાં સ્યુસાઇડલ બિહેવિયરને કારણે પોતાને નુકસાન પહોંચાડતા કિશોરોની સંખ્યા ઝડપી વધી રહી છે. છેલ્લાં 11 વર્ષમાં આવાં બાળકો તેમજ કિશોરોની સંખ્યા વધીને 163% સુધી પહોંચી ચૂકી છે. તેમાં મોટા ભાગનાં બાળકો 11થી 14 વર્ષના છે. ડાર્ટમાઉથ કૉલેજના સંશોધકોએ 47 લાખ 68 હજાર બાળકો અને કિશોરો પરના ડેટાનું સંશોધન કરીને આ રિપોર્ટ તૈયાર કર્યો છે. રિપોર્ટ અનુસાર, 2009 અને 2019ની વચ્ચે, મેન્ટલ હોસ્પિટલોમાં 25.8% બાળકો ભરતી થયાં હતાં અને તેમની સારવાર પાછળ 1 હજાર કરોડ રૂપિયા ખર્ચાયા છે.
2009માં હોસ્પિટલમાં આત્મહત્યાનો પ્રયાસ કરનારા અથવા પોતાને નુકસાન પહોંચાડીને પોતાનો ઇલાજ કરાવનારાં બાળકો અથવા કિશોરોની સંખ્યા 30.7% હતી. આ સંખ્યા 2019 સુધીમાં વધીને 64.2% એટલે કે બમણાથી વધુ વધી છે. તદુપરાંત આત્મઘાતી પ્રયાસો કરનારાં બાળકોની ટકાવારી 2009ના 3.5%થી વધીને 2019માં 12.7% થઇ ચૂકી છે.
સ્ટોની બ્રુક યુનિવર્સિટી મેડિકલ કૉલેજમાં બાળ અને કિશોર મનોચિકિત્સાના ડાયરેક્ટર ડૉ. ગ્રેબિયલ એ.નું કહેવું છે કે અમેરિકન યુવાઓના આત્મઘાતી વ્યવહારમાં વધારો એ કોઇ નવી બાબત નથી. પરંતુ આ રિસર્ચ હેલ્થ સિસ્ટમની સમસ્યાને દર્શાવે છે. બાળકોની સારવાર માટે વાલીઓએ દરેક સ્તર પર અનેક સમસ્યાનો સામનો કરવો પડે છે.
