સ્મૃતિ મંધાના-પલાશે સોશિયલ મીડિયા પરથી લગ્નના ફોટો-વીડિયો હટાવ્યા
ભારતીય મહિલા ક્રિકેટ ટીમની વાઇસ કેપ્ટન સ્મૃતિ મંધાના અને સંગીતકાર પલાશ મુચ્છલે પોતાના સોશિયલ મીડિયા અકાઉન્ટમાંથી લગ્નના ફોટો-વીડિયો હટાવી દીધા છે. આ બંનેના લગ્ન 23 નવેમ્બરના રોજ થવાના હતા. આ દરમિયાન સ્મૃતિના પિતા શ્રીનિવાસ મંધાનાની તબિયત ખરાબ થઈ હતી અને તેમને હોસ્પિટલમાં દાખલ કરવા પડ્યા. જેના કારણે લગ્ન હાલ ટળ્યા છે.
ત્યાર બાદ પલાશની પણ તબિયત બગડી ગઈ અને તેને હોસ્પિટલમાં જવું પડ્યું. જોકે, સારવાર બાદ તેને રજા આપવામાં આવી છે. સ્મૃતિના પિતા પણ સ્વસ્થ થઈ રહ્યા છે. તેમને સોમવારે હોસ્પિટલમાંથી રજા મળી શકે છે.
લગ્નની તૈયારીઓ પૂર્ણ થઈ ગઈ હતી અને મહેમાનો પણ આવી ગયા હતા સ્મૃતિ અને પલાશના લગ્નની બધી તૈયારીઓ પૂર્ણ થઈ ગઈ હતી. બંને પક્ષના મહેમાનો આવી ગયા હતા. આ દરમિયાન રવિવારે સવારે નાસ્તો કરતી વખતે સ્મૃતિના પિતા અચાનક બીમાર પડી ગયા. શરૂઆતમાં તે એક નાની સમસ્યા જેવું લાગતું હતું, પરંતુ થોડીવારમાં, પરિસ્થિતિ ગંભીર બની ગઈ અને તેમને સાંગલીની એક હોસ્પિટલમાં દાખલ કરવા પડ્યા.
આ કારણે લગ્ન મુલતવી રાખવામાં આવ્યા હતા. સ્મૃતિના મેનેજર તુહિન મિશ્રાના જણાવ્યા અનુસાર, જ્યાં સુધી તેના પિતા સંપૂર્ણપણે સ્વસ્થ ન થાય ત્યાં સુધી લગ્ન થશે નહીં.
