ઇઝરાયેલમાં ફસાયેલા ભારતીયોને કાઢવાની તૈયારી
ઇઝરાયલ-હમાસ યુદ્ધનો આજે પાંચમો દિવસ છે. આ દરમિયાન ઈઝરાયલે પેલેસ્ટાઈન પર ફોસ્ફરસ બોમ્બ ફેંક્યા છે. પેલેસ્ટાઈનની ન્યૂઝ એજન્સી 'વફા' અનુસાર, ઈઝરાયલની સેનાએ ગાઝાને અડીને આવેલા અલ-કરામા શહેર પર પ્રતિબંધિત ફોસ્ફરસ બોમ્બનો ઉપયોગ કર્યો છે. આ બોમ્બ જે વિસ્તારમાં પડે છે ત્યાં ઓક્સિજનનો સ્તર ઘટી જાય છે. એના કણો એટલા નાના હોય છે કે એ માનવ શરીરમાં પ્રવેશ કરે છે.
એ જ સમયે ઇઝરાયલે ગાઝામાં હમાસની 200 જગ્યા પર રાતોરાત હુમલો કર્યો. ઈઝરાયલની વાયુસેનાએ કહ્યું હતું કે તેમણે હમાસ કમાન્ડર મોહમ્મદ ડેઈફના પિતાના ઘર પર હુમલો કર્યો છે. ટાઈમ્સ ઓફ ઈઝરાયલના અહેવાલ મુજબ, આ હુમલામાં ડેઈફના ભાઈનું મોત થયું હતું.
બીજી તરફ, રશિયાના રાષ્ટ્રપતિ વ્લાદિમીર પુતિને પહેલીવાર યુદ્ધને લઈને નિવેદન આપ્યું છે. તેમણે કહ્યું- આ યુદ્ધ અમેરિકન વિદેશનીતિની નિષ્ફળતા છે. અમેરિકા પેલેસ્ટાઈનનાં હિતોની અવગણના કરી રહ્યું છે.
