2 મહિનામાં ચિપવાળા પાસપોર્ટ મળી જશે

દેશમાં હવે તમામ લોકોને આગામી બે મહિનામાં ઈ-પાસપોર્ટ મળવાનું શરૂ થઈ જશે. ચિપ ધરાવતા આ પાસપોર્ટના તમામ ટેક્નિકલ પરીક્ષણ પૂરાં થઈ ચૂક્યાં છે. નાસિકસ્થિત ઈન્ડિયન સિક્યોરિટી પ્રેસમાં પહેલા વર્ષે 70 લાખ ઈ-પાસપોર્ટની બ્લેન્ક બુકલેટ છપાઈ રહી છે. આ પ્રેસમાં ચિપથી સજ્જ 4.5 કરોડ પાસપોર્ટ છાપવાનો ઓર્ડર મળ્યો છે.

41 એડવાન્સ ફીચર ધરાવતા આ પાસપોર્ટ ઈન્ટરનેશનલ સિવિલ એવિયેશન ઓર્ગેનાઈઝેશન (આઈસીએઓ)ના તમામ માપદંડ પૂરા કરે છે. તેના થકી 140 દેશના એરપોર્ટ પર ઈમિગ્રેશન પ્રક્રિયા ગણતરીની મિનિટોમાં પૂરી થઈ જશે. દેખાવમાં આ સામાન્ય પાસપોર્ટ જેવો જ છે. ફક્ત બુકલેટ વચ્ચે કોઈ પેજ પર રેડિયો ફ્રિક્વન્સી આઈડેન્ટિફિકેશન ચિપ અને છેલ્લે નાનકડું ફોલ્ડેબલ એન્ટેના રહેશે.

આ ચિપમાં આપણી બાયોમેટ્રિક ડીટેલ અને તે તમામ બાબત હશે, જે બુકલેટમાં પહેલેથી છે. પાસપોર્ટ સેવા પ્રોગ્રામ 2.0 નામની આ યોજના હેઠળ તમામ નવા પાસપોર્ટમાં આવી ચિપ હશે. જૂની બુકલેટ રિ-ઈસ્યૂ વખતે ઈ-પાસપોર્ટમાં અપગ્રેડેશનનો વિકલ્પ મળશે. એ વખતે જૂનો પાસપોર્ટ જમા કરાવવાનો રહેશે.