ઓસામાને મારનાર અમેરિકાના પૂર્વ કમાન્ડરની ધરપકડ
પાકિસ્તાનના એબોટાબાદમાં ઘૂસીને આતંકવાદી ઓસામા બિન લાદેનને મારનાર યુએસ નેવી સીલના ભૂતપૂર્વ કમાન્ડર રોબર્ટ જે ઓ'નીલની ટેક્સાસ શહેરમાંથી ધરપકડ કરવામાં આવી છે. નીલ પર દારૂના નશામાં મારપીટ અને અભદ્ર વર્તન કરવાનો આરોપ લગાવવામાં આવ્યો હતો.
જો કે, જેલ રેકોર્ડમાં માત્ર મારપીટ કરાયાનો ઉલ્લેખ છે. ન્યૂયોર્ક પોસ્ટના અહેવાલ મુજબ, નીલની ધરપકડના થોડા કલાકો બાદ જ તેને 2 લાખ 88 હજાર રૂપિયાના બોન્ડ પર મુક્ત કરવામાં આવ્યો હતો.
ન્યૂયોર્ક પોસ્ટના રિપોર્ટ અનુસાર આ પહેલીવાર નથી જ્યારે નીલ પર જાહેરમાં અભદ્ર વર્તન કરવાનો આરોપ લાગ્યો હોય. 2020 માં કોવિડ દરમિયાન, તેમણે માસ્ક પહેરવાનો ઇનકાર કર્યો હતો. ત્યારબાદ ડેલ્ટા એરલાઈને તેના પર પ્રતિબંધ લગાવી દીધો. 2016 માં પણ તેમની સામે નશામાં ડ્રાઇવિંગ કરવાનો આરોપ લગાવવામાં આવ્યા હતા.
નીલ હંમેશા દાવો કરે છે કે તે પોતે એ મિશનમાં સામેલ હતો જેણે ઓસામા બિન લાદેનને મારવા માટે ઓપરેશન ચલાવ્યું હતું. જો કે, યુએસ સરકાર ન તો તેના દાવાને નકારતી નથી કે સમર્થન પણ કરતી નથી.
