ચીન બૉર્ડર પર ફાઇટર જેટ, હેલિકોપ્ટર અને ડ્રોન સાથે હવાઈ ફૌજ, જાણો શેની તૈયારી કરી રહી છે એરફોર્સ

અરુણાચલ પ્રદેશના તવાંગ સેક્ટરમાં ચીની સૈનિકો સાથેની અથડામણ બાદ હવે આર્મીથી લઈને એરફોર્સ એલર્ટ પર છે. ભારતીય વાયુસેના આગામી 48 કલાકમાં ચીનની સરહદને અડીને આવેલા ચાર એરબેઝ પર એક મોટી સૈન્ય કવાયત કરવા જઈ રહી છે. આ કવાયતમાં વાયુસેનાના ફાઈટર એરક્રાફ્ટ, હેલિકોપ્ટર અને ડ્રોન સામેલ થશે. આ દાવપેચ એરફોર્સના ઈસ્ટર્ન કમાન્ડ દ્વારા કરવામાં આવશે.

મળતી માહિતી મુજબ આ કવાયત 15 અને 16 ડિસેમ્બરે ચીનની સરહદ પાસે યોજાશે. જે ચાર એરબેઝ પર વાયુસેનાનો આ દાવપેચ યોજાશે તેમાં તેજપુર, ચાબુઆ, જોરહટ અને હાશિમારાનો સમાવેશ થાય છે. અરુણાચલ પ્રદેશના તવાંગ સેક્ટરમાં 9 ડિસેમ્બરે ભારત અને ચીનના સૈનિકો વચ્ચે અથડામણ થઈ હતી.

આવા સમયે ભારતીય વાયુસેનાની આ કવાયતને તવાંગમાં થયેલી અથડામણ સાથે પણ જોડવામાં આવી રહી છે. જો કે, વાયુસેનાનું કહેવું છે કે, આ એક નિયમિત કવાયત છે અને તેની પહેલેથી તારીખ હતી અને તેને અથડામણ સાથે કોઈ લેવાદેવા નથી. આ કવાયતનો હેતુ પૂર્વીય ક્ષેત્રમાં તેની કામગીરી અને ક્ષમતાઓનું પરીક્ષણ કરવાનો છે. પૂર્વોત્તર કમાન્ડ દ્વારા ચીન, બાંગ્લાદેશ અને મ્યાનમારની સરહદો પર નજર રાખવામાં આવે છે.

તવાંગમાં શું થયું હતું ?

ભારતીય સેનાએ સોમવારે એક નિવેદન જાહેર કરીને કહ્યું હતું કે, 9 ડિસેમ્બરે તવાંગ સેક્ટરમાં ભારતીય અને ચીની સૈનિકો વચ્ચે અથડામણ થઈ હતી. આ અથડામણમાં બંને પક્ષના કેટલાક જવાનો ઘાયલ થયા હતા. સંરક્ષણ પ્રધાન રાજનાથ સિંહે મંગળવારે લોકસભામાં જણાવ્યું હતું કે ભારતીય સેનાએ બહાદુરીપૂર્વક PLA (પીપલ્સ લિબરેશન આર્મી)ને અમારા ક્ષેત્રમાં અતિક્રમણ કરતા અટકાવ્યા અને તેમને તેમની પોસ્ટ પર પાછા ફરવા માટે મજબૂર કર્યા. રાજનાથ સિંહે એમ પણ કહ્યું કે આ અથડામણમાં ન તો ભારતીય સેનાનો એક જવાન શહીદ થયો છે કે ન તો કોઈ ગંભીર રીતે ઘાયલ થયું છે. તે જ સમયે, આ અથડામણ પછી, ચીને પણ કહ્યું કે સરહદ પર સ્થિતિ 'સ્થિર' છે.