ઉપલેટાના વાડલા રોડ પાસે મોજના પાણીનો પ્રવાહ લાલ બની જતાં ચિંતા
ઉપલેટા શહેરમાંથી વહેતી મોજ નદીના પાણીનો પ્રવાહ વાડલા પાસે અચાનક લાલ થઈ જતાં આ મુદો ચર્ચાસ્પદ બની ગયો છે અને નદી કાંઠાના વિસ્તારમાં આવેલ પાણીના પ્રવાહે ત્રણ-ચાર દિવસથી રંગ બદલ્યો હોવાનું સામે આવ્યું છે. આ લાલ પાણીને લઈને અહીં રહેતા સ્થાનિક લોકો અને માલધારીઓમાં ચિંતાનો માહોલ જોવા મળી રહ્યો છે.
ઉપલેટા મોજ નદી કાંઠે વાડલા રોડ પર રહેતા સ્થાનિકોએ રોષભેર જણાવ્યું છે કે, તેઓ અહીં છેલ્લા ઘણા સમયથી રહે છે અને પોતે માલધારી છે. જેથી અહીંયા તેઓ તેમજ આસપાસના વિસ્તારના માલધારીઓ પશુઓને પાણી પાવા તેમજ ચરાવવા માટે આવતા હોય છે. છેલ્લા ત્રણ-ચાર દિવસથી પાણીનો આવો રંગ જોવા મળી રહ્યો હોઇ લોકોમાં ચિંતા ફેલાઇ છે. આથી સંબંધિત તંત્ર આ બાબતને ગંભીરતાથી લઇ જેમણે પણ પાણીને પ્રદુષિત કરવાની હિલચાલ કરી હોય તેમને કડક સજા કરે અથવા તો પાણી લાલ થવાનું જે કારણ છે તે જાણી આ સમસ્યાનો ઉકેલ લાવે તે સમયની માગ છે તેમજ દોષિતો સામે કડક કાર્યવાહી કરવાની પણ આ તકે માગણી કરી છે.
