ગૂગલ વેક્ટર મેપ સાથેનું વિશ્વનું પહેલું ઇલેક્ટ્રિક સ્કૂટર
દેશની અગ્રણી સ્માર્ટ ઇલેક્ટ્રિક સ્કૂટર કંપની એથર એનર્જીએ ગૂગલ વેક્ટર મેપ ધરાવતું દુનિયાનું પહેલું ઇ-સ્કૂટર લોન્ચ કર્યું છે. એથર કમ્યુનિટી ડે દરમિયના કંપનીએ એથરસ્ટેક-5.0 અંતર્ગત એથર 450 સીરિઝના સ્કૂટર્સમાં સોફ્ટવેર અપડેટની જાહેરાત કરી છે. આ ઇવેન્ટ દરમિયાન એથર સ્કૂટર્સના ચાર નવા રંગ કોસ્મિક બ્લેક, સાલ્ટ ગ્રીન, ટ્રૂ રેડ અને લ્યૂનર ગ્રેનું લોન્ચિંગ કર્યું હતું.
કમ્યુનિટી ડે દરમિયાન એથર એનર્જીના સહ-સ્થાપક અને CEO તરુણ મહેતાએ જણાવ્યું હતું કે કંપનીના નવા ઉપરાંત જૂના ગ્રાહકોને પણ આ નવા ફીચર્સનો ફાયદો મળશે. નવા યૂઝર ઇન્ટરફેસના કેટલાક ફીચર્સ એવા પણ છે જે મોંઘી લક્ઝરી કારોમાં પણ ઉપલબ્ધ નથી. આ ઇન્ડસ્ટ્રીમાં એક અલગ જ પહેલ છે.
એથર એનર્જીના ચીફ બિઝનેસ ઓફિસર રવનીત એસ ફોકેલાએ જણાવ્યું કે એથરના ગ્રાહકોનો ભરોસો જ કંપનીની સૌથી મોટી મૂડી છે. ગત વર્ષ એથર માટે ઉપલબ્ધિઓથી ભરપૂર રહ્યું હતું. આ દરમિયાન કંપનીએ 59,123 સ્કૂટરનું વેચાણ કર્યું હતું. 2023માં કંપનીના આઉટલેટની સંખ્યા 56થી વધીને 120 કરવાની યોજના છે. કંપની પાસે 900 ફાસ્ટ ચાર્જીંગ સ્ટેશનનું દેશનું સૌથી મોટું નેટવર્ક છે. આ વર્ષના અંત સુધીમાં તેની સંખ્યા 1300થી વધુ થશે.
બેટરી પ્રોટેક્ટશન વોરંટી પણ આપશે
એથર એનર્જીએ ઇવી સ્કૂટર ઇન્ડસ્ટ્રી માટે પહેલી બેટરી પ્રોટેક્ટ વોરંટી લોન્ચ કરી છે. તે અંતર્ગત 5 વર્ષ માટે 60 હજાર કિલોમીટરના અંતર સુધી વોરંટી મળશે. તેમાં બેટરી ફેલ્યોર કવર ઉપરાંત 5 વર્ષ બાદ બેટરીની 70% ક્ષમતા પણ યથાવત્ રહેવાની ગેરેંટી મળશે. એથરનો દાવો છે કે એથર એકમાત્ર ઇવી સ્કૂટર કંપની છે જે આ ગેરેંટીની સાથે ડીપ ડિસ્ચાર્જને પણ કવર કરે છે.
