અર્થતંત્રને વેગ આપવા સરકારના અનેકવિધ પગલાં

કેન્દ્ર સરકાર ભારતને $5 ટ્રિલિયનની ઇકોનોમી બનાવવાના લક્ષ્યાંકને સિદ્ધ કરવા માટે અત્યારથી અનેકવિધ પગલાં લઇ રહી છે. સરકાર ઇન્ટરનેશનલ મોનેટરી ફંડના વર્ષ 2026-27 સુધીમાં લક્ષ્યાંકને પૂરા કરવાના અંદાજ કરતાં પણ ઝડપી ગતિએ તેને હાંસલ કરવા માટે સતત પ્રયાસરત છે. અગાઉ IMFએ તેના વર્લ્ડ ઇકોનોમિક આઉટલૂકમાં જણાવ્યું હતું કે ભારતીય અર્થતંત્રનું કદ 2021-22ના $3.2 ટ્રિલિયનથી વધીને વર્ષ 2022-23માં $3.5 ટ્રિલિયન અને વર્ષ 2026-27માં $5 ટ્રિલિયનને આંબશે.

રાજ્યકક્ષાના નાણામંત્રી પંકજ ચૌધરીએ રાજ્યસભામાં જણાવ્યું હતું કે સરકાર વર્ષ 2026-27 પહેલા જ $5 ટ્રિલિયનની ઇકોનોમીના લક્ષ્યને હાંસલ કરવા માટે પ્રતિબદ્ધ છે. વૈશ્વિક અર્થતંત્રમાં અનિશ્વિતતા જોવા મળી રહી છે. જો કે વૈશ્વિક ઇકોનોમિક આઉટલૂકમાં અનિશ્વિતતા ઘટવાને કારણે ભારત વહેલા $5 ટ્રિલિયનની ઇકોનોમીએ પહોંચી શકશે.