શહેરોમાં બેરોજગારી ઘટી, ગામોમાં વધી, હરિયાણા-રાજસ્થાનમાં 28%થી વધારે
દેશમાં ફેબ્રુઆરીમાં બેરોજગારી દર 7.45% રહ્યો હતો જે જાન્યુઆરીમાં 7.14% હતો. મહત્ત્વની વાત એ છે કે શહેરી વિસ્તારોમાં બેરોજગારી દર 8.55%થી ઘટીને 7.93% થયો છે. ગ્રામ્ય વિસ્તારોમાં દર 6.45%થી વધીને 7.23% પર પહોંચ્યો છે. બેરોજગારી દર હજુ પણ શહેરમાં જ વધુ છે. CMIEના સરવે અનુસાર દેશમાં સૌથી વધુ બેરોજગારી રાજસ્થાન અને હરિયાણામાં છે. હરિયાણામાં 29.4% તેમજ રાજસ્થાનમાં 28.3% છે. છત્તીસગઢ (0.8%) અને મધ્યપ્રદેશ (2.0%) સૌથી સારી સ્થિતિમાં છે. એક અન્ય રિપોર્ટ અનુસાર ગત નાણાકીય વર્ષમાં ગ્રામીણ મહિલાઓની સ્થિતિ સારી રહી છે. શહેરની મહિલાઓમાં બેરોજગારી દર 27.9% હતો, જ્યારે ગ્રામીણ મહિલાઓમાં તે માત્ર 4.5% નોંધાયો હતો.
કેન્દ્ર અને રાજ્યમાં સરકારી નિયુક્તિઓ 1 વર્ષમાં 8% ઘટી, રાજ્યોમાં ભરતી કોવિડ પહેલાથી પણ ઓછી
- કેન્દ્ર તેમજ રાજ્ય સરકારોના NPS ડેટા અનુસાર વર્ષ 2022માં કુલ 5,65,500 નવા સબસ્ક્રાઇબર્સ જોડાયા હતા. આ સંખ્યા 2021ની તુલનાએ 8% ઓછી છે.
- કેન્દ્ર સરકાર તરફથી કુલ 1.18 લાખ નવા સબસ્ક્રાઇબર એનપીએસથી જોડાયા. તેમાં 65.2% લોકો 18થી 28 વર્ષની વચ્ચેના છે. 2021માં સરેરાશ 67.8% હતી.
- રાજ્ય સરકારો તરફથી કુલ 4,47,480 નવા સબસ્ક્રાઇબર્સ જોડાયા. તેમાં 33% જ 18થી 28 વર્ષની વયજૂથના છે. આ સરેરાશ ગત વર્ષથી 2% વધી છે.
દુનિયાભરમાં આઇટી સેક્ટરમાં છટણી છતાં ભારતમાં ભરતી 10% વધી
નોકરી જોબસ્પીક અનુસાર ફેબ્રુઆરી, 2023માં ભારતમાં આઇટી સેક્ટરમાં ભરતીઓ ફેબ્રુઆરી 2022ની તુલનાએ 10% વધી છે. જ્યારે, દુનિયાભરના મુખ્ય દેશોમાં છટણી હજુ બંધ થઇ નથી. આ સેક્ટરમાં સૌથી વધુ માંગ વિશેષજ્ઞોની છે. જેમ કે - ડેટા એનાલિટિક્સ મેનેજર, બિગ ડેટા એન્જિનિયર, ક્લાઉડ સિસ્ટમ એડમિનિસ્ટ્રેટર વગેરે. નેસકૉમ અનુસાર 2023માં ભારતના આઇટી સેક્ટરનું કદ 8.4% વધી શકે છે.
