સોમવારે અમેરિકાના રાષ્ટ્રપતિ ટ્રમ્પે બે એક્ઝિક્યુટિવ ઓર્ડર પર હસ્તાક્ષર કર્યા. પહેલા ઓર્ડરમાં, પૈસા જમા કરાવ્યા વિના આરોપીઓને મુક્ત કરવાની સિસ્ટમ (કેશલેસ જામીન) નાબૂદ કરવામાં આવી હતી. જ્યારે બીજા ઓર્ડરમાં, અમેરિકન ધ્વજ સળગાવનારાઓ સામે કડક કાર્યવાહી કરવાની જોગવાઈ કરવામાં આવી છે.
ટ્રમ્પના એક્ઝિક્યુટિવ ઓર્ડર મુજબ, અમેરિકન ધ્વજ સળગાવનારાઓને જેલમાં ધકેલી દેવા જોઈએ અને જો તેઓ ઇમિગ્રન્ટ્સ હોય, તો તેમને દેશમાંથી દેશનિકાલ કરવાનો ઉલ્લેખ કરાયો છે.
1989માં યુએસ સુપ્રીમ કોર્ટે 5-4ના બહુમતીથી ચુકાદો આપ્યો હતો કે ધ્વજ સળગાવવો એ અભિવ્યક્તિ સ્વાતંત્ર્યનો અધિકાર છે, પરંતુ ટ્રમ્પે એટર્ની જનરલ પામ બોન્ડીને એવો કેસ શોધવા કહ્યું છે જે આ ચુકાદાને પડકારી શકે.
વ્હાઇટ હાઉસના એક અધિકારીના જણાવ્યા અનુસાર, બે મહિના પહેલા, લોસ એન્જલસમાં વિરોધીઓએ અમેરિકન ધ્વજ સળગાવ્યા હતા અને મેક્સીકન ધ્વજ લહેરાવ્યા હતા, જેનાથી ટ્રમ્પ ગુસ્સે થયા હતા.
