બાળક કોઠીમાં ઉતર્યો, ઢાંકણું બંધ થઈ જતાં મોત
મજૂરી કરીને પરિવારનું ગુજરાન ચલાવતું દંપતી શનિવારે સવારે પોતાના એકના એક પુત્રને ઘરે મૂકીને કામ પર ગયું હતું, મહિલા સાંજે ઘરે પરત આવી ત્યારે વહાલસોયો જોવા નહીં મળતાં તેની શોધખોળ શરૂ કરી હતી અને અંતે પોલીસમાં જાણ કરતા પોલીસે અપહરણનો ગુનો નોંધી તપાસ શરૂ કરી હતી, બાળકે કેવા રંગના કપડાં પહેર્યા હતા તે જોવા માટે માતાએ ઘઉંની કોઠીનું ઢાંકણ ખોલતાં જ પુત્રનો મૃતદેહ તેમાંથી મળી આવ્યો હતો.
માતા પિતા સવારે કામ પર ગયા હતા
ચુનારાવાડ પાસેના શિવાજીનગરમાં રહેતા જયેશભાઇ બારૈયા અને તેના પત્ની ઉષાબેન બારૈયા શુક્રવારે સવારે કામ પર ગયા હતા, તેમનો નવ વર્ષનો પુત્ર મીત બીમાર હોવાથી તે શાળાએ ગયો નહોતો અને ઘરે રોકાયો હતો જ્યારે ચાર વર્ષની પુત્રી બંસીને જયાબેન તેના માતાના ઘરે મૂકી ગયા હતા, સાંજે સાડાચાર વાગ્યે ઉષાબેન કામ પરથી ઘરે આવ્યા ત્યારે પુત્ર મીત જોવા નહીં મળતાં તેમણે પાડોશમાં રહેતા જેઠ દીપકભાઇના ઘરે તપાસ કરતાં ભત્રીજી અર્ચનાએ કહ્યું હતું કે, ચાર વાગ્યે મીતને ઘર નજીક રમતા જોયો હતો, પુત્ર લાપતા થયાની જયેશભાઇને જાણ કરાતા તેઓ પણ ઘરે પહોંચી ગયા હતા અને બારૈયા પરિવારે પરિવારજનો અને સંબંધીઓને ત્યાં તપાસ કરી હતી તેમજ કુવાડવા સુધી રૂબરૂ જઇ પુત્રની શોધખોળ કરવા છતાં તેનો પત્તો નહીં લાગતા અંતે મીત ગુમ થયા અંગેની થોરાળા પોલીસને જાણ કરવામાં આવી હતી.
