ગોંડલના ભુણાવામાં કૂવામાંથી અજાણ્યા યુવકની લાશ મળી

ગોંડલ તાલુકાના ભુણાવા ગામની સીમનાં કૂવામાં અજાણ્યા યુવકની લાશ તરતી હોવાની જાણ પોલીસને થતાં પોલીસ અને પાલિકાના તરવૈયાઓ ઘટના સ્થળે દોડી ગયા હતા અને લાશને કૂવામાંથી બહાર કાઢી ફોરેન્સિક પીએમ માટે રાજકોટ ખસેડવામાં આવી હતી.

આ યુવકની લાશ એટલી હદે કોહવાઇ ગઇ છે કે ઓળખ માટે પોલીસને મહેનત કરવી પડે તેવી સ્થિતિ છે. બીજી તરફ પોલીસે યુવકની હત્યા થઇ છે કે આત્મહત્યા? તેમજ ઓળખ સહિતના મુદે તપાસ આરંભી છે. પ્રાપ્ત વિગત મુજબ ગોંડલ તાલુકાના ભુણાવા ગામના સીમ વિસ્તારમાં આવેલી નરશીભાઈ જસમતભાઈ પટેલના વાડીનાં કૂવામાં અજાણ્યા યુવકની લાશ તરતી હોવાની જાણ થતા પોલીસ અને તરવૈયાઓએ સ્થળ પર પહોંચી કૂવામાંથી અજાણ્યા યુવકના મૃતદેહને બહાર કાઢ્યો હતો. યુવાનનો મૃતદેહ કોહવાયેલી હાલતમાં હોય પોસ્ટમોર્ટમ માટે ગોંડલ સિવિલ હોસ્પિટલ બાદ ફોરેન્સિક પી.એમ.માટે રાજકોટ સિવિલ હોસ્પિટલમાં ખસેડાયો હતો.