રશિયા-યુક્રેન યુદ્ધ!
અમેરિકા હવે યુક્રેનના વધુ જવાનોને એડવાન્સ્ડ બેટલફિલ્ડ ટેક્ટિક્સની ટ્રેનિંગ આપશે. અમેરિકી સંરક્ષણ વિભાગ પેન્ટાગોને કહ્યું કે જર્મનીમાં સૈનિક અડ્ડા પર આ જવાનોને સંયુક્ત યુદ્ધની રણનીતિની તાલીમ અપાશે. દર મહિને 500 જવાનોની એક બટાલિયનને ટ્રેનિંગ અપાશે. હજુ સુધી 3000થી વધારે જવાનોને ટ્રેનિંગ અપાઇ છે. તેમાં ઇન્ફેન્ટ્રી, આર્ટિલરી, હથિયારબંધ ગાડીઓ વધારે ઉપલબ્ધ થયા બાદ વાયુ સેનાની વચ્ચે સારા સંકલનની સાથે સંયુક્ત હથિયારોના યુદ્ધ પર ભાર અપાશે.
યુક્રેનના અધિકારી વધારે જવાનોને ફ્રન્ટ લાઇનથી ખસેડીને ટ્રેનિંગમાં મોકલવાને લઇને ચિંતિત રહ્યા છે. પરંતુ ઠંડીના કારણે કેટલાક મોરચા પર યુદ્ધ ધીમું થવાથી હવે ટ્રેનિંગ માટે વધુ જવાનોને મોકલવાની બાબત શક્ય બનશે. દરમિયાન રશિયાએ શુક્રવારે યુક્રેનના કેટલાંક શહેરો પર 60 મિસાઇલો ઝીંકી છે. યુક્રેનની વાયુસેનાએ તમામ મિસાઇલોને તોડી પાડી છે.
મિસાઇલ હુમલાના કારણે દેશભરમાં હવાઇ હુમલાના એલાર્મ વાગી રહ્યા છે. અધિકારીઓએ ચાર શહેરોમાં ધડાકા થવાની સૂચના આપી છે. બે લોકોનાં મોત થયાં છે. કીવ અને ખારકીવમાં વીજળી ડુલ થઇ ગઇ છે.
