ખાણીપીણીની સામગ્રી મોંઘી થતાં રિટેલ ફુગાવો વધીને 4.81% થયો
મોંઘવારીમાં દરમાં ઘટાડાનું વલણ હવે અટક્યું છે. જૂનમાં છૂટક ફુગાવો 4.81 ટકા પર પહોંચ્યો હતો. જે ત્રણ મહિનામાં સૌથી વધારે છે. ગયા વર્ષે જૂનમાં આ દર 7 ટકા હતો. મોંઘવારી વધવાનું મુખ્ય કારણ મસાલા, અનાજ અને કઠોળના ભાવમાં વધારો છે. રાહતની વાત એ છે કે ફુગાવાનો દર હજુ પણ આરબીઆઈના કમ્ફર્ટ ઝોનમાં છે (6%થી નીચે).
આરબીઆઈ આવતા મહિનાની શરૂઆતમાં દ્વિમાસિક નાણાકીય નીતિ જાહેર કરશે. તે મુખ્યત્વે રિટેલ ફુગાવાને ધ્યાનમાં લે છે. નેશનલ સ્ટેટિસ્ટિકલ ઓફિસ દ્વારા બહાર પાડવામાં આવેલા આંકડા અનુસાર, ખાદ્ય ફુગાવો જૂનમાં વધીને 4.49% થયો હતો જે મે મહિનામાં 2.96% હતો.
મસાલાનો ફુગાવાનો દર 19.19%, અનાજ અને ઉત્પાદનોનો 12.71%, કઠોળનો 10.53% હતો. જોકે, આ સમયગાળા દરમિયાન તેલ અને ચરબી (-18.12%) અને શાકભાજી (-0.93%)ના ભાવમાં ઘટાડો થયો હતો.
