ભાવ રૂ. 200ને પાર થતાં કાપોદ્રાની માર્કેટમાંથી 150 કિલો ટામેટાં ચોરાયાં

શહેરમાં ટામેટાંના ભાવ 200ને પાર થતાં હવે ટામેટાંની ચોરી પણ થવા માંડી છે. ઉત્રાણમાં 17 હજારના બટાકાની ચોરી બાદ હવે કાપોદ્રામાં 3 ગૂણ ટામેટાં (અંદાજે 150 કિલો) ની ચોરી થઇ છે. જો કે, બાબતે વેપારીએ ફરિયાદ નોંધાવી નથી.

હવે ટામેટાંની ચોરી પણ થવા માંડી
કાપોદ્રામાં અક્ષર ડાયમંડ નજીક આવેલી શાકભાજી માર્કેટમાં રવિવારે સવારે ટામેટાંની ચોરી થઇ હતી. વેપારી રાત્રે તમામ સામાન બાંધીને ગયા બાદ સવારે આવ્યો તો ટામેટાંની 3 ગૂણની ચોરી થઇ હોવાનું ધ્યાન પર આવ્યું હતું. તપાસ કરતાં સીસીટીવીમાં કોઈ યુવક ટામેટાં લઇ જતો નજરે પડ્યો હતો.

સામાન્ય લોકો માટે ટામેટાં ખરીદવા મુશ્કેલ બની ગયા
આ બાબતે વેપારીએ કાપોદ્રા પોલીસને જાણ કરી હતી. જો કે, ફરિયાદ આપી નથી. સામાન્ય લોકો માટે ટામેટાં ખરીદવા મુશ્કેલ બની ગયા છે. બીજી તરફ બે દિવસથી શાકભાજીની ચોરી થવાની ઘટના બનતા વિક્રેતા તેમજ નાના વેપારીઓના જીવ અધ્ધર થઇ ગયા છે. મોંઘવારી વચ્ચે ચોરી થતાં તેમને બમણો માર વાગી રહ્યો છે.