બોલિવૂડના કિંગ શાહરૂખ ખાનની દીકરી સુહાના ખાન કરોડોના જમીનના સોદાને કારણે મુશ્કેલીમાં મુકાઈ ગઈ છે. મહારાષ્ટ્રના અલીબાગના થલ ગામે સરકારે ખેડૂતોને ખેતી માટે આપેલી જમીન સુહાનાએ ખરીદી હોવાના આક્ષેપ છે. તેણે જમીન ખરીદવા માટે જરૂરી પરવાનગી ન લીધી હોવાની અને દસ્તાવેજો પૂરાં ન કર્યા હોવાનો આક્ષેપ પણ લાગ્યો છે. ત્યારે મુંબઇ પોલીસના રેસિડેન્ટ ડેપ્યુટી કમિશનરે આ સોદાની તપાસ માટે અલીબાગ મામલતદાર પાસેથી રિપોર્ટ માંગ્યો છે.
INASના અહેવાલ મુજબ, સુહાનાએ લગભગ 12.91 કરોડ રૂપિયામાં આ જમીન ખરીદી છે. સુહાનાએ મુંબઇના કફ પરેડમાં રહેતા ખોટે પરિવાર સાથે આ સોદો કર્યો છે અને 77.46 લાખ રૂપિયાની સ્ટેમ્પ ડ્યુટી પણ ચૂકવી છે. આ ટ્રાન્સફર 30 મે 2023ના રોજ સ્ટાન્ડર્ડ ચાર્ટર્ડ બેંક દ્વારા કરવામાં આવ્યું હતું. હાલમાં આ સમગ્ર મામલાની તપાસ ચાલી રહી છે. અલીબાગ મામલતદાર પાસેથી પોલીસે નિષ્પક્ષ તપાસ અહેવાલ માંગ્યો છે.
મહારાષ્ટ્ર કૃષિ જમીન અધિનિયમ, 1961 મુજબ, ફક્ત તે વ્યક્તિ, જે પોતે ખેડૂત છે (અથવા જેનો પરિવાર પહેલેથી જ ખેતીની જમીન ધરાવે છે), ખાતેદાર છે, તે જ ખેતીની જમીન ખરીદી શકે છે. બિન-ખેડૂતો આવી જમીન સીધી ખરીદી શકતા નથી.
જો સરકારે ખેડૂત પરિવારને ફક્ત ખેતી માટે જમીન આપી હોય, તો તે જમીન સીધી વેચી શકાતી નથી. આ માટે કલેક્ટરની મંજૂરી લેવી જરૂરી છે. ખરીદનાર અને વેચનાર બંનેએ કલેક્ટર પાસેથી NOC લેવી પડે છે.
