કીમ પૂર્વ વિસ્તારમાં સ્ટેટ હાઇવેની ખુલ્લી ગટરમાં લોડેડ કન્ટેનર પલટી ગયું હોવાનો એક અકસ્માતનો બનાવ સામે આવ્યો છે. આ ઘટનામાં ડ્રાઈવરનો ચમત્કારિક બચાવ થયો હતો.
કીમ-ઓલપાડ સ્ટેટ હાઇવે 65 અકસ્માતોનું કેન્દ્ર બની ગયો છે. કીમ રેલવે ઓવરબ્રિજ બન્યા બાદ, કીમ પૂર્વના ઉદ્યોગો અને સુરત-હજીરા તરફ જતા ભારે વાહનો આ માર્ગ પર બેફામ રીતે પસાર થાય છે, જેના કારણે જીવલેણ અકસ્માતો સર્જાય છે.
ગઈકાલે રાત્રે ચાર કલાકના ગાળામાં ત્રણ અકસ્માત સર્જાયા હતા. પ્રથમ ઘટનામાં, કીમ સ્ટેટ હાઇવે 65 પર નવાપરા ગામ નજીક એક આઇસર ટેમ્પાના ચાલકે એક મહિલાને અડફેટે લીધી, જેમાં મહિલાને સામાન્ય ઇજા થઈ હતી. તેના થોડાં સમય બાદ, મુન્ના એજન્સી નજીક રખડતા ઢોરને કારણે એક બાઇકસવાર કન્ટેનરમાં ઘૂસી ગયો અને તેનું ઘટનાસ્થળે જ મૃત્યુ થયું હતું.
