જમ્મુ-કાશ્મીરમાં સેનાએ પાકિસ્તાની ઘૂસણખોરને ઠાર કર્યો

જમ્મુ-કાશ્મીરના સાંબામાં BSFએ રવિવારે મોડી રાત્રે એક પાકિસ્તાની ઘૂસણખોરને ઠાર માર્યો. સેનાના સૂત્રો અનુસાર, સાંબા જિલ્લામાં LoC પર સરહદ પારથી ઘૂસણખોરીનો પ્રયાસ કરવામાં આવી રહ્યો હતો, જેને નિષ્ફળ બનાવવામાં આવ્યો. હવે સમગ્ર વિસ્તારમાં સર્ચ ઓપરેશન ચલાવવામાં આવી રહ્યું છે.

આ તરફ, કઠુઆ જિલ્લામાં પણ LoC નજીક પાકિસ્તાની ડ્રોન જોવા મળ્યું. સેનાના સૂત્રો અનુસાર, આ ડ્રોન નિયમિત દેખરેખ દરમિયાન જોવા મળ્યું હતું. જવાબી કાર્યવાહીમાં એન્ટી-ડ્રોન સિસ્ટમ્સ સક્રિય કરવામાં આવી છે. 20 જાન્યુઆરીએ પણ કઠુઆમાં જ સરહદ નજીક ડ્રોન જોવા મળ્યા હતા.

છેલ્લા 15 દિવસમાં સરહદ નજીક 6 વખત ડ્રોન જોવા મળ્યા છે. આ પહેલા 17 જાન્યુઆરીની સાંજે લાઇન ઓફ કંટ્રોલ (LoC) ને અડીને આવેલા રામગઢ સેક્ટરમાં પણ ડ્રોન જોવા મળ્યું હતું. સેનાની જવાબી કાર્યવાહી બાદ ડ્રોન પાકિસ્તાન તરફ પાછું ફર્યું હતું.

તે જ રીતે, 15 જાન્યુઆરીના રોજ રામગઢ સેક્ટરમાં એકવાર, 13 જાન્યુઆરીના રોજ રાજૌરી જિલ્લામાં બે વાર ડ્રોન જોવા મળ્યા હતા. 11 જાન્યુઆરીના રોજ નૌશેરા સેક્ટર, ધરમસાલ સેક્ટર, રિયાસી, સાંબા અને પૂંછના મંકોટ સેક્ટરમાં એકસાથે પાંચ ડ્રોન જોવા મળ્યા હતા. સેના અને સુરક્ષા એજન્સીઓ પરિસ્થિતિ પર નજર રાખી રહી છે.