દાળિયા ગામમાં જયરાજસિંહનો પુત્ર બોગસ મતદાન કરાવતો હોવાનો આક્ષેપ
ગોંડલના દાળિયા ગામે બોગસ મતદાન થતું હોવાનું રીબડાના અનિરૂદ્ગસિંહ જાડેજાના પુત્ર રાજદીપસિંહે ચૂંટણીપંચમાં ફરિયાદ કરી છે. રાજદીપસિંહે જણાવ્યું હતું કે, જયરાજસિંહના પુત્ર બોગસ મતદાન કરાવે છે. દાળિયા ગામના લોકોએ બોગસ મતદાન થતું હોવાની માહિતી આપી હતી. આથી પોલીસ બંદોબસ્ત વધારવામાં આવ્યો છે. લોકો મોબાઈલ સાથે રાખીને મતદાન કરવા જતા હોવાનું સામે આવ્યું છે. એક મહિલા હાથમાં કાળા કલરનો મોબાઈલ લઈ મતદાન કરવા પહોંચી હોવાનું સામે આવ્યું છે. મતદાન મથકમાં એક શખ્સ દ્વારા બોગસ મતદાન કરાવવામાં આવતું હોવાનો વીડિયો પણ વાઇરલ થયો છે.
ધોરાજીમાં પત્નીની જગ્યાએ પતિ BLO બની ગેરકાયદેસર પ્રવૃત્તિ કરાવતો
રાજકોટ જિલ્લા ચૂંટણી અધિકારી અરુણ મહેશ બાબુને ધોરાજી વિધાનસભા મત વિસ્તારમાં ગેરકાયદેસર પ્રિસાઈડિંગ ઓફિસરની કામગીરી કરતાં વ્યક્તિની માહિતી મળતાની સાથે જ ત્વરિત પગલાઓ લેવામાં આવ્યા છે. ઉલ્લેખનીય છે કે ધોરાજી વિધાનસભા મત વિસ્તારમાં ધોરાજી મતદાન મથક 169માં બોગસ પ્રિસાઈડિંગ ઓફિસર કામગીરી કરી રહ્યાના સમાચાર વહેતા થયા હતા. આ સમાચાર ઉપર તાત્કાલિક કાર્યવાહી કરતાં જાણવા મળ્યું હતું કે, બોગસ પ્રિસાઈડિંગ ઓફિસર નહીં પરંતુ બુથ લેવલ ઓફિસર તેમની પત્નીની જગ્યાએ બી.એલ.ઓ ગેરકાયદેસર રીતે કામગીરી કરી રહ્યા હતા. જિલ્લા ચૂંટણી અધિકારી દ્વારા ત્વરિત કાર્યવાહી કરીને ગેરકાયદેસર બી.એલ.ઓ.ને હટાવીને નવા બી.એલ.ઓ.ને નિયુક્ત કરવામાં આવ્યા છે. અપક્ષ ઉમેદવારે આક્ષેપ કર્યો છે કે, આ શખ્સ બોગસ મતદાન કરાવતો હતો.
