સિલેક્શન ન થતા ઈશાને પ્રેક્ટિસ છોડી દીધી હતી

'દરેક સફળતા પાછળ સંઘર્ષ હોય છે.' ટીમ ઈન્ડિયાના વિકેટ કીપર બેટર ઈશાન કિશને આ વાક્યને સાચું સાબિત કર્યું છે. 7થી 11 જૂન દરમિયાન રમાનારી વર્લ્ડ ટેસ્ટ ચેમ્પિયનશિપની ફાઈનલ માટે ભારતીય ક્રિકેટ ટીમમાં તેની પસંદગી કરવામાં આવી છે. જો ઈશાનને ઓસ્ટ્રેલિયા સામે રમવાની તક મળે છે તો તે ઈશાનની ટેસ્ટ કારકિર્દીની શરૂઆત હશે.

WTC ફાઈનલ પહેલા, ઈશાન કિશનના પિતા પ્રણવ પાંડેએ ભાસ્કરને તેના સંઘર્ષની વાર્તા સંભળાવી. પ્રણવ નિખાલસતાથી ઈશાનની શરૂઆતની કારકિર્દી, WTC પસંદગી અને IPL પ્રદર્શન વિશે વાત કરે છે.

તેમણે કહ્યું કે સિરીઝ માટે ટીમની જાહેરાત થવાની હતી, એ વાત કન્ફર્મ થઈ ગઈ હતી કે ઈશાનને પસંદ કરવામાં આવશે, પરંતુ તેને ટીમમાં તક ન મળી. એ પછી ઈશાન બે દિવસ ટેન્શનમાં રહ્યો. થોડા દિવસ પ્રેક્ટિસમાં પણ ગયો ન હતો.

આઈપીએલ શરૂ થઈ ત્યારે ઈશાન ઘણો નાનો હતો, પરંતુ ત્યારથી તે ધોનીને બેટર તરીકે આદર્શ માનતો હતો. જ્યારે તેણે કીપિંગ કરવાનું શરૂ કર્યું ત્યારે તે ધોનીથી વધુ પ્રભાવિત થયો હતો. BCCI દ્વારા બિહાર ક્રિકેટ એસોસિએશન પર પ્રતિબંધના કારણે તેને ઝારખંડ જવું પડ્યું હતું. ત્યાં તેને ધોનીની નજીક આવવાનો મોકો મળ્યો. ઈશાન ધોનીની જેમ આંતરરાષ્ટ્રીય ક્રિકેટમાં પોતાને સ્થાપિત કરવા માંગે છે.