તહેવારોમાં ખર્ચ કરવા લોનનો ટ્રેન્ડ વધ્યો!

આ તહેવારોની સિઝનમાં ભારતીયોમાં પર્સનલ લોનનું ચલણ ઝડપથી વધી રહ્યું છે. તેનાથી ઓવરઑલ રિટેલ લોનમાં ગ્રોથ જોવા મળ્યો છે. કન્ઝ્યુમર ડ્યુરેબલ્સ લોન પ્રિ-કોવિડ સ્તર (2019)ની તુલનામાં આશરે બમણી થઈ ગઈ છે. ખાસ વાત એ છે કે પર્સનલ લોનમાં જેટલો વધારો મુંબઈ-દિલ્હી જેવાં શહેરોમાં થયો છે લગભગ તેટલો જ વધારો ટિયર-2 શહેરો-જિલ્લા મથકોમાં પણ નોંધાયો છે.

ક્રેડિટ બ્યૂરો સીઆરઆઈએફ હાઈમાર્કના તાજા રિપોર્ટ પ્રમાણે, માર્ચ-સપ્ટેમ્બર 2019ની તુલનામાં પર્સનલ અને કન્ઝ્યુમર ડ્યુરેબલ્સ લોન 25% સુધી વધી છે, જ્યારે પહેલાં આટલા ગાળામાં 11% ગ્રોથ નોંધાયો હતો. કોટક ઈન્સ્ટિટ્યૂશનલ ઈક્વિટીના રિપોર્ટ પ્રમાણે, દેશમાં કુલ રૂ. 174.3 લાખ કરોડની લોન લેવાઈ છે. તેમાંથી 48.9% લોન રિટેલ સેગમેન્ટની છે. નિષ્ણાતોનું માનવું છે કે નવી લોનમાં બમણો વધારો એ વાતનો સંકેત છે કે અર્થતંત્રમાં ગતિ આવી ગઈ છે.

બીજી તરફ એસબીઆઈના અહેવાલ પ્રમાણે આ વર્ષે કુલ પૈકી 36% લોન ટિયર-3 અને ટિયર-4 જિલ્લામાં લેવાઈ છે. તે દર્શાવે છે કે નાના કસબામાં પણ અર્થતંત્ર ઝડપથી પાટા પર ચઢી રહ્યું છે. આ વર્ષે અપાયેલી અડધાથી વધુ પર્સનલ લોન છેલ્લા બે મહિનામાં અપાઈ છે. એટલે કે આ લોન તહેવારોની ખરીદી માટે લેવાઈ છે.