કરાચીમાં સંતાઈને બેઠેલા આતંકવાદી દાઉદ ઇબ્રાહિમે ડી-કંપનીની જવાબદારી નાના ભાઈ અનીસ કાસકરને સોંપી દીધી હોવાનો ભારતીય ગુપ્તચર એજન્સીઓનાં સૂત્રોએ દાવો કર્યો છે. અત્યાર સુધી ડી-કંપનીની જવાબદારી દાઉદનો જમણો હાથ ગણાતો છોટા શકીલ સંભાળતો હતો પરંતુ દાઉદ અને શકીલ વચ્ચે 2 વર્ષથી ચાલી રહેલા ખટરાગને કારણે કાળા ધંધાનાં કામને અસર પડતી હોવાથી દાઉદે શકીલને હટાવી અનીસને ખુરશી પર બેસાડ્યો છે.
કરાચીમાં બેઠેલો અનીસ જ મુંબઈની ગૅંગના સાગરીતોને આદેશો આપી રહ્યો હોવાનો દાવો પણ એજન્સીનાં સૂત્રો કરી રહ્યાં છે. સાથે જ ભારત-અમેરિકામાં માદક પદાર્થોની તસ્કરી, તમાકુનો વ્યવસાય, ભારતીય ચલણની બનાવટી નોટોનું કામ પણ અનીસ જ સંભાળી રહ્યો છે. દાઉદ, અનીસ અને શકીલ, ત્રણેય કુખ્યાતો અત્યારે કરાચીમાં જ સંતાઈને બેઠા છે. એજન્સીનાં સૂત્રોના કહેવા પ્રમાણે ડી-કંપનીના ઉત્તરાધિકારીમાં પરિવર્તનની રૂપરેખા દાઉદના 60મા જન્મદિવસે જ તૈયાર થવા લાગી હતી. થોડાં વર્ષોથી શકીલને અનીસ સાથે અણબનાવ શરૂ થયો હતો. કેટલીય બેઠકોમાં બંને એકસાથે જાહર રહેતા નહોતા. આથી અનીસે ડી-કંપનીના કર્તાહર્તા તરીકે નિર્ણયો લીધા. અનીસે નશીલાં દ્રવ્યોના વેપારમાં ઊંડે સુધી પોતાની જાળ બિછાવી છે.
