બ્રિટનમાં ભારતીય વિદ્યાર્થીની છરી મારીને હત્યા

બ્રિટનમાં 30 વર્ષીય ભારતીય વિદ્યાર્થી વિજય કુમારની છરીના ઘા ઝીંકીને નિર્દયતાથી હત્યા કરવામાં આવી. તે હરિયાણાના ચરખી દાદરી જિલ્લાનો રહેવાસી હતો. પરિવારે ભારત સરકારને તાત્કાલિક મદદ, નિષ્પક્ષ તપાસ અને મૃતદેહને વહેલી તકે ભારત લાવવા વિનંતી કરી છે.

આ દુઃખદ ઘટના 15 નવેમ્બરની રાત્રે વોર્સેસ્ટર શહેરના બારબોર્ન રોડ પર બની હતી. વિજય ગંભીર ઇજાઓ સાથે રસ્તા પર પડેલો મળી આવ્યો હતો. તેને તાત્કાલિક હોસ્પિટલ લઈ જવામાં આવ્યો, પરંતુ થોડા સમય પછી તેનું મોત થયું.

પ્રાથમિક પોલીસ રિપોર્ટ અનુસાર, હત્યા પહેલા કોઈ બાબતને લઈને ઝઘડો થયો હતો, ત્યારબાદ તેના પર છરી વડે અનેક વાર હુમલો કરવામાં આવ્યો હતો. જોકે, હત્યાનો સાચો હેતુ હજુ સ્પષ્ટ થયો નથી અને બ્રિટિશ પોલીસે આ ઘટના વિશે કોઈ વિગત જાહેર કરી નથી.