ટિ્વટર પર હવે બ્લૂની સાથે ‘ગ્રે’ અને ‘ગોલ્ડ’ ચેક પણ જોવા મળશે
ટિ્વટર હવે આગામી શુક્રવાર સુધીમાં બ્લૂ ચેક સબસ્ક્રિપ્શન ફીચર લોન્ચ કરી શકે છે. કંપનીના સીઈઓ ઈલોન મસ્કે એક ટિ્વટના જવાબમાં આ અંગે માહિતી આપી હતી. તેમણે જણાવ્યું કે ટિ્વટર આગામી શુક્રવારે એટલે કે 2 ડિસેમ્બરે બ્લૂ ચેક સબસ્ક્રિપ્શન સંભવિત રીતે લોન્ચ કરી શકે છે. મસ્કે કહ્યું કે સોશિયલ મીડિયા પ્લેટફોર્મ દ્વારા સંગઠનો અને વ્યક્તિઓ માટે અલગ અલગ રંગના ચેકનો ઉપયોગ કરાશે.
મસ્કે એક ટિ્વટમાં કહ્યું હતું કે કંપનીઓ માટે ગોલ્ડ ચેક, સરકારો માટે ગ્રે ચેક, સેલિબ્રિટી કે અન્ય વ્યક્તિઓ માટે વાદળી ચેક હશે. મસ્કે કહ્યું કે ચેક એક્ટિવ થતાં પહેલાં તમામ વેરિફાઈડ એકાઉન્ટ્સને મેન્યુઅલ રીતે પ્રમાણિત કરાશે.
ખરેખર કંપનીએ તાજેતરમાં બહાર પાડેલી 8 ડૉલરની બ્લૂ ચેક સબસ્ક્રિપ્શન સેવા અટકાવી દીધી હતી કેમ કે તેના લીધે ફેક એકાઉન્ટનું પૂર આવી ગયું હતું. તેના પછી જણાવાયું હતું કે ફરી માગ થતા બ્લૂ ચેક સબસ્ક્રિપ્શન સેવા 29 નવેમ્બરથી ફરી શરૂ કરાશે.
