રાજકોટ શહેરમાં કોરોનાના કેસ કૂદકે અને ભૂસકે વધી રહ્યા છે. શુક્રવારે એક જ દિવસમાં 22 નવા પોઝિટિવ કેસ આવ્યા છે. જોકે રાહતની વાત એ છે કે, એક જ દિવસમાં 36 દર્દીઓને ડિસ્ચાર્જ જાહેર કરવામાં આવ્યા છે. આ સાથે કુલ કેસનો આંક 144 થયો છે જ્યારે એક્ટિવ કેસની સંખ્યા 102 છે. સૂત્રોના જણાવ્યા મુજબ નવા કેસ આવવાની ગતિ બે સપ્તાહમાં ખૂબ વધી છે અને ડબલિંગ રેટ એટલે કે કેસ બમણા થવાનો ગાળો ઘટીને 5 દિવસ થઈ ગયો છે.
શુક્રવારે જે નવા કેસ આવ્યા છે તેમાં મોટાભાગના છૂટાછવાયા વિસ્તારના છે અને તમામની કોઇ ટ્રાવેલ હિસ્ટ્રી મળી નથી તેમજ રસીના ડોઝ લીધેલા છે અને હોમ આઈસોલેટ છે તેમજ એક દર્દી હોસ્પિટલમાં દાખલ છે. અત્યાર સુધીમાં જે પણ કેસ આવ્યા છે તેમાંથી સિવિલ હોસ્પિટલમાં 3 જ્યારે ખાનગી હોસ્પિટલમાં બે દર્દી દાખલ અને એક ગંભીર હોવાથી વેન્ટિલેટર પર છે.
