શહેરના રેલનગર વિસ્તારમાં રહેતા આધેડના મોબાઇલમાં ચાઇલ્ડ પોર્નોગ્રાફી હોવાની ટીપલાઇન મોકલી સીઆઇડી ક્રાઇમ ગાંધીનગરે તપાસના આદેશ કર્ય હતા. રાજકોટ સાયબર ક્રાઇમ પોલીસે આધેડના મોબાઇલને એફએસએલ ગાંધીનગર મોકલ્યો હતો. જેના રિપોર્ટમાં આધેડે ચાઇલ્ડ પોર્નોગ્રાફીનો ડેટા એકત્રિત કર્યાનું ખૂલતાં આધેડ સામે ગુનો નોંધવામાં આવ્યો હતો.
સાયબર ક્રાઇમ પોલીસ સ્ટેશનના પીએસઆઇ જે.કે. જાડેજાએ નોંધાવેલી ફરિયાદમાં આરોપી તરીકે રેલનગરની મહારાણા પ્રતાપ ટાઉનશિપમાં રહેતા શૈલેષ નવલશંકર દીક્ષિત (ઉ.વ.46)નું નામ આપ્યું હતું, પીએસઆઇ જાડેજાએ ફરિયાદમાં જણાવ્યું હતું કે, સીઆઇડી ક્રાઇમ ગાંધીનગર તરફથી 22 જુલાઇ 2020ના ટીપલાઇન મળી હતી જેમાં ચોક્કસ મોબાઇલ નંબર અને ફેસબુક એકાઉન્ટ પર ચાઇલ્ડ પોર્નોગ્રાફીના વીડિયો અપલોડ કરવામાં આવ્યા અને ફરતા કરવામાં આવ્યાનો નિર્દેશ કરવામાં આવ્યો હતો.
સાયબર ક્રાઇમ પોલીસની ટીમે તે મોબાઇલ નંબરના યુઝર શૈલેષ દીક્ષિતને બોલાવી તેનો મોબાઇલ કબજે કરી મોબાઇલ ગાંધીનગર એફએસએલમાં મોકલી આપવામાં આવ્યો હતો. એફએસએલ રિપોર્ટ મુજબ શૈલેષ દીક્ષિતના મોબાઇલમાંથી ચાઇલ્ડ પોર્નોગ્રાફીનો ડેટા મળી આવ્યાનો રિપોર્ટ આવતાં સાયબર ક્રાઇમ પોલીસ સ્ટેશનના પીએસઓ દીપક પંડિતે ગુનો નોંધ્યો હતો.
