6 થી 7 માસના શિશુઓને પણ ઓરી થતાં તબીબો ચોંક્યા રોજના 15 કેસો : WHO જેેનેટિકલ એનાલિસિસ કરશે
જામનગર શહેરની સરકારી જી.જી. હોસ્પિટલ બાળદર્દીઓથી ઉભરાઈ રહી છે. ત્યારે આમાં એક ચોંકાવનારી બાબત સામે આવી છે જેમાં અત્યાર સુધી ન થતા હોય તેવા 6થી 7 માસના બાળકને પણ ઓરી થવા લાગી છે. જેના કારણે ડોક્ટરો પણ ચોંકી ઉઠ્યા છે અને આ મામલે બાળદર્દીઓના સેમ્પલ લઈ ડબલ્યુએચઓ તેનું જેનેટિકલ એનાલિસીસ કરવામાં લાગી ગયું છે. જેથી આનું કારણ જાણી શકાય.
શહેરની સરકારી જી.જી. હોસ્પિટલ બાળદર્દીઓથી ઉભરાઈ રહી છે. અહીં દાખલ થયેલા બાળકોની સંખ્યા ક્ષમતા કરતા બમણી થઈ ગઈ છે જેના કારણે એક ખાટલા પર બબ્બે બાળકને સૂવડાવીને સારવાર આપવામાં આવી રહી છે. દરમિયાન ડોક્ટરોના આ બાળદર્દીઓની તપાસમાં ચોંકાવનારી વિગતો બહાર આવી છે જેમાં કદી ન બનતું હોય તેમ દરરોજના 15 જેટલા કેસ ફક્ત ઓરીના આવી રહ્યા છે. આમાં પણ એવા કેસ સામે આવ્યા છે જેમાં 6-7 માસના બાળકને પણ ઓરી થઈ છે. જેના કારણે ડોક્ટરો પણ મુંઝવણમાં મુકાઈ ગયા છે.
સામાન્ય રીતે 9 માસ સુધી ઓરી થવાની શક્યતા નહીંવત હોય છે પરંતુ આ નવા ઓરીના રોગથી ડોક્ટરો પણ ચોંકી ઉઠ્યા છે અને બાળકોના સેમ્પલ લઈ ડબલ્યુએચઓ દ્વારા તેનું પૃથ્થકરણ કરવામાં આવી રહ્યું છે જેનાથી આ થવાનું કારણ જાણી શકાય. ડોક્ટરો પણ આવી ઘટનાને વિરલ ગણાવે છે.
