રશિયાના શહેર પેસ્કોવના એરપોર્ટ પર ડ્રોન હુમલો થયો છે. રશિયન મીડિયા TASS અનુસાર, આ હુમલામાં 4 Il-76 મિલિટરી ટ્રાન્સપોર્ટ વિમાન નાશ પામ્યા હતા. હુમલામાં કોઈને ઈજા થઈ હોવાના સમાચાર નથી. ગવર્નર મિખાઇલ વેદરનિકોવે હુમલાની પુષ્ટિ કરી છે. રશિયન સૈન્ય સતત ડ્રોનને તોડી પાડવાના પ્રયાસ કરી રહ્યું છે. પેસ્કોવ એરપોર્ટથી તમામ ફ્લાઈટ્સ રદ કરી દેવામાં આવી છે અને એરસ્પેસ પણ બંધ કરી દેવામાં આવી છે.
ગવર્નર મિખાઇલે કહ્યું- અમે એરપોર્ટ અને તેના રનવેને થયેલા નુકસાનની સમીક્ષા કરી રહ્યા છીએ. જ્યારે હુમલો થયો ત્યારે હું ત્યાં હાજર હતો. રશિયાએ આ હુમલા માટે યુક્રેનને જવાબદાર ગણાવ્યું છે. રશિયન ટેલિગ્રામ ચેનલો અનુસાર, લગભગ 12 ડ્રોનના હુમલા થયા. આ દરમિયાન એરપોર્ટ નજીક વિસ્ફોટનો અવાજ સંભળાયો હતો. પેસ્કોવ એસ્ટોનિયા અને લાતવિયાના દેશોની ખૂબ નજીક છે. આ બંને દેશો નાટોના સભ્ય છે.
