જૂનાગઢ એલસીબીએ લીસ્ટેડ બુટલેગર ધીરેન કારીયાએ મોકલાવેલ 4.06 લાખના ઇંગ્લીશ દારૂ સાથે 1ને ઝડપી લીધો છે. આ અંગે મળતી વિગત મુજબ દારૂની બદીને નાબુદ કરવા રેન્જ આઇજીપી મયંકસિંહ ચાવડા,એસપી રવિતેજા વાસમ શેટ્ટીની સૂચના બાદ એલસીબીએ તપાસ હાથ ધરી હતી. દરમિયાન બાતમી મળી કે, જીજે 13 એટી 4216 નંબરના વાહનમાં ઇંગ્લીશ દારૂની હેરાફેરી થનાર છે. આ વાહન ધોરાજીથી નિકળી ગયું છે અને ધંધુસર જવાનું છે. ત્યારે એલસીબી ઇન્ચાર્જ પીઆઇ જે. જે. પટેલ, પીએસઆઇ જે.જે. ગઢવી, ડી.કે. ઝાલા અને સ્ટાફે વોચ ગોઠવી હતી.
દરમિયાન વાહન નિકળતા તેનો પીછો કરતા વાહન ચાલકે આંબલીયાથી રવની,રવનીથી ધંધુસર, ધંધુસરથી આંબલીયા અને આંબલીયાથી વાડોદર થઇ નાની મારડ ગામ તરફ વાહન ભગાવી મૂક્યું હતું. જોકે, એલસીબીએ ફિલ્મી ઢબે પીછો કરી વાહન આડું રાખી દેતા વાહન ચાલકે વાહન રોક્યું હતું પરંતુ નાસી જવાની કોશિષ કરી હતી. જોકે,એલસીબીએ તેની કોશિષ નિષ્ફળ બનાવી ધંધુસર ગામના જયેશ ઉર્ફે જયલો કનુભાઇ મુળીયાસીયાની અટક કરી હતી.
એલસીબીએ 4,06,780નો ઇંગ્લીશ દારૂ, 20,000નો મોબાઇલ, 4,640 રોકડા અને 5,00,000નું વાહન મળી કુલ 9,31,420નો મુદ્દામાલ કબ્જે કર્યો છે. જ્યારે માલ મોકલનાર જૂનાગઢ જિલ્લાના લીસ્ટેડ બુટલેગર ધીરેન ઉર્ફે ધીરેન શેઠ કારીયા તેમજ અન્ય આરોપી ધંધુસરના હમીર ઉર્ફે હમીરો ઉર્ફે ભુટો ઉર્ફે મામો મેણંદભાઇ મુળીયાસીયા,ઝાંઝરાડા રોડના દેવા સુંડાવદરા અને નરબત ઉર્ફે નબો નગાભાઇ ઓડેદરાને ઝડપી લેવા તપાસના ચક્રો ગતિમાન કર્યા છે.
