તુર્કિયે-સિરિયામાં ભૂકંપના 3 મોટા આંચકા

મધ્ય પૂર્વના ચાર દેશો તુર્કિયે (જૂનું નામ તુર્કી), સિરિયા, લેબેનોન અને ઈઝરાયેલ સોમવારે સવારે ભૂકંપથી હચમચી ગયા હતા. અહીં 12 કલાકમાં મોટા ભૂકંપ આવ્યા હતા. સૌથી વધુ તબાહી એપીસેન્ટર તુર્કિયે અને તેની નજીકના સિરિયાના વિસ્તારોમાં જોવા મળી રહી છે.

ન્યૂઝ એજન્સી રોઇટર્સ અનુસાર- તુર્કિયે અને સીરિયામાં અત્યાર સુધીમાં 4300થી વધુ લોકોના મોત થયા છે. લેબનોન અને ઈઝરાયેલમાં પણ ભૂકંપના આંચકા અનુભવાયા હતા, પરંતુ અહીં કોઈ નુકસાન થયું નથી. તુર્કીમાં અત્યાર સુધીમાં 2921 લોકોએ જીવ ગુમાવ્યા છે. 15 હજારથી વધુ લોકો ઘાયલ થયાના સમાચાર છે. સરકારે 7 દિવસનો રાષ્ટ્રીય શોક જાહેર કર્યો છે. જ્યારે, સીરિયામાં 1444 લોકો માર્યા ગયા અને 2 હજારથી વધુ ઘાયલ થયા છે.

તુર્કિયેના મીડિયા અનુસાર- 3 મોટા આંચકા આવ્યા. તુર્કીના સમય મુજબ પહેલો, સવારે લગભગ 4 વાગ્યે (7.8) અને બીજો લગભગ 10 (7.6) વાગ્યે અને ત્રીજો બપોરે 3 વાગ્યે (6.0). આ સિવાય 78 આફ્ટરશોક્સ નોંધાયા હતા. તેમની તીવ્રતા 4 થી 5 હતી.